مفاجأة مش ظريفة ..:(

الحمد لله .. مرت 3 حصص بسلام و بهدوء ..

و الاهم .. انهم بلا خسائر ..:D

صحيح .. حصلت مواقف .. لا داعى لذكرها .. كان الراجل غالبا كده حيتشل منى :)

بس مش مشكلة كل ده ..

فى المرة الاولى .. و احنا سايقين .. كان بيسألنى عن انا فين .. يعنى شغال ايه ..

و طبعا انا مش ناقص حد يسألنى اسئلة مالهاش لازمة دلوقتى و انا بسوق ..

فرديت عليه بسرعة ..

" لا .. دا انا لسه طالب فى تالتة صيدلة "

" بس انا بتدرب فى صيدلية "

فضحك ضحكة كده ..

وانا نفضّتله ..و ركزت فى السواقة ..:D

المهم النهاردة .. و انا فى امان اللة .. لقيته قالى .. يعنى مجبتليش الدوا ولا حاجة ..

قلتله ..

" انت مقولتش انت عايز ايه اساسن "

قالى انا عايز ******

مش عارف .. حسيت ان الدوا ده .. من الاخر كده تبع الجدول ..

جدول الادوية المخدرة ..

و قولت فى سرى .." ييييية .. شكله كده حيشتغلى فى دور عم الشمام

بعد ما الحمد لله خلصت و مشيت

و انا راجع وكأنى راجع بعد معركة منتصر .. ..:)

قلت اسأل الدكتور اللى معايا فى الصيدلية .. اذا كان الدوا ده تبع الجدول ولا لأ..

و للاسف كالمتوقع طلع تبع الجدول ..

و انا دلوقتى اتزنقت ...

يا ترى ايه انسب وسيلة .. انى افهمه انى زى ما تقولوا كده هارشة ...:D

لأنى طبعا مش حديلة حاجة ..

و الموضوع كله .. ناقصلى حصة واحدة .. و خلاص ..

بس لسه بدرى عليها ..

فى الاسبوع الجاى ..

ربنا يستر