الأحد، ٢٧ يوليو ٢٠٠٨

حد عارف حاجة !!!

" حسبى الله و نعم الوكيل .. 1034 واحد ماتوا و ياخدوا براءة !!!!! "
طبعا الراجل عنده حق .. لما فى يوم يسمع ان مراته و 4 من اولاده ماتوا فى يوم واحد ..
يعنى فجأة فقد اهله كلهم .. لأ و بدل ما يلاقى محاكمة سريعة و عقوبات ..
لأ ..المحاكمة بتقعد سنتين و نص .. لأ و كمان بياخدوا براءة ..
ده انا كنت حاسس انهم شوية و حيعاقبوا الناس اللى غرقوا و اهلهم .. لانهم اكيد عملوا حاجة فى العبارة ..
هو الشعب المصرى كده .. مش بيحافظ على النعمة ..

شعب غريب !!!!

...

لأ و العجيب ان كل القنوات ساعة الحادث و كعادة المصريين .. كانوا متحمسين جدااا...

كله عمل فريق تحقيق و بحثوا .. و قالوا كلام عن حاجات كانت فى العبارة و منتهية الصلاحية ..

و ان العبارة نفسها اصلا منتهية الصلاحية .. و مفيش حاجات للنجاة كافية و قصص كتير ..

حسسوا الناس انو على الاقل الراجل حيعدم فى ميدان عام ..

ده غير ان طبعا المقولة الشهيرة ..

" لا احد فوق القانون "

..

لأ و بعد فترة .. الراجل سافر لندن .. و قالوا للعلاج ..

طب يسافر ازاى .. و كارثة زى دى حصلت ..
اتحدى ان حد يقدر يدى سبب مقنع للناس ..
و بعدين بقى اتقدم بلاغ للنيابة و حصلت القضية ..


و على ما حصل الاستدعاء .. كان طبعا سافر الى لندن ..

طب الراجل راح فين ..

قالوا لندن .. طب مش المفروض يرجع عشان فيه محاكمة و كده ..
لأ .. اصل مفيش بين مصر و انجلترا اتفاقية لتسليم المتهمين و كده ..

و سبحان الله .. الراجل كان مسافر لندن بالصدفة ..

طبعا المعلومة بتاعه الاتفاقية مكانتشى معروفة ..

و طبعا للعلاج ..

اكيد ربنا حيشفيه بدعوات اهالى الضحايا !!!
...

حاجة تانية امبارح حصلت ..
كل الدنيا كانت بتتكلم على الفيلم الايرانى بتاع اعدام فرعون .. و كله بيتكلم و تقريبا محدش شافه ..

محدش يعرف ان الفيلم اصلا فيلم تسجيلى ..

و ان شخصيات كتيرة جداا منها جيهان السادات طالعين فى الفيلم .. و معظم اللى بيتكلموا فى الفيلم شخصيات مصرية و شهيرة جداا

و القصة اصلا .. ان شركة مصرية حضّرت فيلم تسجيلى وسجلت مع شخصيات من مصر و كانوا بيتكلموا عن الفترة بتاعة الاغتيال

و اسباب الاغتيال و اراؤهم ...

المهم بعد كده شركة ايرانية اشترت الفيلم ده .. و بعدين زودت شوية بدايات فى الاول ..

طبعا كلام مش كويس و خصوصا ان الراجل مات ...

الطريف بقى .. و انا بشوف برنامج 90 دقيقة امبارح ..

على لسان طلعت السادات .. بيشبه عمه بالخليفة العادل الزاهد عمر بن عبد العزيز ..

طبعا انا احترم الرئيس انور السادات .. بس زمن عمر بن عبد العزيز مختلف بشكل كامل

ده الناس مكانوش لاقيين حاجة يعملوها بفلوس الزكاة .. بعد ما الشباب اتجوز و مبقاش فيه ناس محتاجة للفلوس ..

...

من فترة هاجمت جبهة علماء المسلمين احمد عز دون ان تسميه و قالت عليه انو محتكر الحديد فى مصر ..
http://masrawy.com/News/Egypt/Politics/2008/June/30/ezz.aspx

وناس كتيرة اوى فى مصر بيقولوا نفس الكلام ..

و عادى خالص ..

و اللذيذ انو هو اللى كان بيصيغ قانون الاحتكار ..
و الناس كلها ليها رأى ان ده احتكار و عادى خالص ..
و هو لسه مستمر فى مكانه و لا حد كلمه او حيكلمه ..
....
مرتضى منصور و احمد شوبير ..
مرتضى منصور اتهم ناس بالهبل بأنهم حرامية و مرتشين ..
ناس فى اتحاد الكورة ...احمد شوبير .. اعضاء فى الحكومة .. عادى خاااااااااالص ..
طب حد يرد لأ .. طب حد يقدم مستندات و يحاكم .. لأ
طب يا ترى الناس دى فجأة بتبقى كده ..
اكيد لأ ..
طيب لو هو عارف كده من زمان مش معنى لما بيختلفوا معاه ..بيقول عليهم كده ..
ده يديك احتمال ان الكلام مش صح ..
بس لما تفكر و تقول طيب الناس مش بترفع عليه قضية سب و تشهير ليه ؟؟
تبتدى تسئل نفسك ..
هو فيه ايه ..
و هل الموضوع اصلا مصالح ؟؟
...
عادى خالص .. فى كل الكلام اللى مكتوب فوق ده .. مفيش رأى اكيد ..
غالبا يعنى اللى بيحصل ..
ان الناس شايفة حاجة و مقتنعين بيها .. و اللى حاصل و موجود العكس ..
فى حكم المحكمة .. احتكار الحديد .. مرتضى منصور ظالم ولا مظلوم ..

حد عارف حاجة !!!!