الأحد، ٤ مايو ٢٠٠٨

كأس العالم ده كاسنا

كأس العالم ده كاسنا

المكان : جنوب افريقيا ..
الزمان : 2010
الحدث : فوز مصر بكأس العالم ..
مصر : خروج ملايين الجماهير و هى فى حالة من الذهول الشديد .. الشوارع كلها مكتظة بالشعب و البيوت خاوية .. و الناس ماشية مش عارفة هيه بتعمل ايه ..
و اعلام مصر بترفرف حتى تتخيل ان البلد استخدمت كل القماش اللى عندها و عملت بيه اعلام ..

الناس بتفتكر و هيه فى حالة من الذهول .. مصر كسبت البرازيل 3 – 0 و باقدام زكى و عبد ربه و زيدان و كالعادة فشل متعب فى احراز اى جون بعد حالة من النحس مستمرة من 2006 .

الناس بتفتكر مشوار مصر فى البطولة .. محدش قدر يوقف الوحوش عمرو زكى وعبد ربة و زيدان و بوتريكة .. و كان تساؤل الجماهير .. يا ترى مين وراهم !!

مصر حققت اروع انجاز ممكن يتحقق فى تاريخها الكروى ..برغم ان البداية كانت مقلقة جدا حيث تعادلت مع منتخب استراليا 2 – 2 الضعيف كرويا .. و بدأت الاستديوهات التحليل فى تأهيل الشعب المصرى للخروج المبكر و بدأ مذيعو القنوات " اعضاء اتحاد الكورة الاغريقى " فى الحديث عن الخبرة فى كأس العالم و لازم نلعب كتير الاول فى كأس العالم و نتعود .. يعنى موت يا حمااااااااااااااار !!!

و جاء الرد من السماء على هذة الاستديوهات التخليلية " لما يحدث فيها من عك كروى فظيع " و جاء اللقاء الذى تنتظره الجماهير بأكملها ليشاهدوا منتخبنا و هو بيلعب مع منتخب انجلترا .. و طوال 90 دقيقة الناس مكنتش مقتنعة ان الاعيبة اللى بيلعبوا حلو اوى دول و لابسين ابيض و كسبانين دول المنتخب .. الناس قاعدة تقول يا جماعة هو المنتخب لابس ايه !!!!

و جاء اللقاء الاصعب مع منتخب عربى شقيق , و كان لقاء لابد لاحدهما من الفوز حتى يصعد مع منتخب انجلترا . و بدأ اللقاء بسقوط احد اللاعبين لاداء المشهد المعتاد لكن تأتى الرياح بما لا تشتهى السفن , فأدرك الحكم المحاولة لينال اللاعب انذار , فيقوم يجرى ناحية الحكم ليحتج و لا يدرى انه بكده اثبت للحكم ان قراره كان صحيح ..

و تسير المباراه على طريق التعادل , و من هجمة مباغته للمنتخب يحرز المنتخب اول اهدافه و قبل المباراه بعشر دقائق فقط .. لتتحول المباراة من مشهد سينمائى يتسابق اللاعبين السقوط .. حتى لتتسائل هل هذا فيلم السقوط .. فقد سقط طوال المباراه جميع الاعبين .. و لم يتبقى غير المدير الفنى و المدرب !!!

و هكذا تأهل المنتخب و كان القدر رحيما به .. فصعد فريق السويد ليتقابل مع المنتخب المصرى .. و فازت مصر بعد اداء رائع .. و هكذا استمرت مصر لتقابل منتخب فرنسا , و اصاب منتخب مصر هدف فى الدقائق الاولى من الماتش , و حاول الفريق المصرى حتى استطاع فى الدقيقة 94 من احراز التعادل ليحتكم الفريقان لوقت اضافى ليحرز المنتخب هدف الفوز و تصعد مصر مع احسن ثلاثة فرق فى البطولة .

وخرجت الجماهير و هى لا تعلم ماذا يحدث , فالوصول لكأس العالم كان غاية المراد من رب العباد , و لكنها الان ترى فريقا لم تكن تحلم به من قبل .

و بدأت الجماهير تحلم بكأس العالم , وعادت استديوهات التخليل ليؤكدوا انهم كانوا واثقين ان الولاد حيرجعوا بالكاس ,و ان مستوى مصر يضاهى مستوى اقوى الفرق , و طبعا عشان الدورى المحلى بتاعنا الرهيب و السبب التانى اللى لا يقل اهمية عن الاول ان البطولة فى افريقيا و عيب الكأس يطلع بره .

و اصبح امام المنتخب 90 دقيقة فقط امام منتخب الارجنتين لكى يحلقوا الى المباراه النهائية امام منتخب البرازيل , و قدم الاعبين كل ما يستطيع الانسان ان يبذله حتى كنت تحس انهم مش معقوله 11 لاعيب بس .

و صعدت مصر للمباراه النهائية ... و فازت مصر 3 – صفر .. و شعرت ان مصر كلها فرحانة ..و حسيت بأيد بتخبط عليا

و تخبط ..

" مش حتراجع حاجة قبل ما تروح الامتحان "

و صحيت اكتشفت انها كانت تخاريف طالب ليلة امتحان .. و قمت مسرعا عشان اراجع على المنهج اللى طار زى كأس العالم بالظبط ..

تمت...
ملحوظة : البوست ده اتكتب من حوالى شهرين ..
:D