مواقف ..

بدايه ..

يا ريت دعوة كده لوالدتى .. عشان هيه مريضة شوية ..

شفاها الله و عفاها

امييين ...

........................................................................................

يوم الاربع اللى فات كان يوم كوميدى و ظريف ..

كنت واقف فى الصيدليه .. مش معايا اى حد ..

بيبقى فيه دكتورين المفروض واحد الصبح و واحد باليل ..

و لظروف خاصة بيهم .. الدكتور اللى بييجى الصبح بيمشى بدرى ..

و الدكتور الليلى بييجى برضة متأخر ..

:D

و بكون واقف لوحدى حوالى ساعة .. ممكن توصل لساعة و نص ..

اول ما دكتور مشى ...لقيت ناس دخلوا الصيدليه عايزين شاش عشان الواد عنده حروق ..

شـــــــــــــــاش !!!!!!!!!

يا نهار مش فايت ...مش عارف مكانه ..طب اعمل ايه بقى ..

!!!!!!!!!!!!!!!!!!!!!!طب حقولهم ايه .. مفيش شاش فى الصيدلية ..

يبقى فيه حد بيهرج ..

يا الصيدلية ... يا أنا ..

:D

بعدها بشوية ...

بنت صغيرة جت و كان معاها ورقة مكتوب فيها الدوا ..

الحمد لله عرفت الاولانى ..

جانا للتانى ..

هوه كان شراب ..و انا كنت فاكر انى شفته قبل كده

هوه راح فين ... مش لاقيه ..

و انا قاعد ابص على الرف ..راح فين .. راح فين ..

بصيت بسرعة على الرف بتاع تلت مرات ..

و كان واضح عليا المعاناة اوى ..

و فجأه لقيت البنت قاعده تضحك بشكل غير طبيعى ..

بس يا ماما .. بتضحكى على ايه ..

لقيتها قاعده تضحك زياده .

و مش قادرة تمسك نفسها ..

و الدوا مش عارف الاقيه ..

و فجأه ... لقيته ...

هييييييييييييييييييييييييييه

و بعدها بصيت للبنت الصغيرة .. نظرة

نظرة منتصر ..

:D

مش عارف الصيدلية كان مالها اليوم ده ..

كانت محظوظة على غير العادة ..

لدرجة ان لقيت انسه كمان داخلة .

كانت عايزة قطن " و طبعا انا مش عارف مكانه فين "و كانت عايزة حقن انسولين ..

جبتلها .. معجبتهاش ..

و بعدين شكلها جالها اكتئاب منى .. فقالتلى على اسم قطرة ..

والحمد لله كنت عارفها ..

:D

و بعدين قررت بما انها ساكنة قريب من الصيدليه .. انها حتسيب ورقة للدكتور باللى هيه عايزاه ..

و بعدها بتقولى فى الشقة اللى فيها قطط ..

نـــــــــعم !!!!!!!!!!!!!!!!!!!!!!

سألتها سؤال برىء اوى ..

هيه الحاجات دى للقطط ..

اه . للقطط ..

حتى القطرة للقطط ؟؟

اه ..

انا ساعتها كنت حتشل ..

يعنى بعد كل التعب اللى تعبتة

"حاولت ادور على قطن و حقن و قطرة "

و فى الاخر يطلع كل ده عشان قطة ..

اه يا مرارتى ..

انا مش معترض على القطط غير ان الاكل و الرعاية الصحية مكلفة ..

يعنى هيه كانت حتدفع فى حدود 10 جنية ..

مش اى دار ايتام اولى بالمبلغ ده ..على الاقل طفل يتيم حيستفاد بيهم ..

.......................................................................................

قصة هامه جدا..
من فترة كده .. ساعات بلاقى موبايلى بيرن ..
شخص بيدى Missed
طبعا .. يا ترى مين ده .. و بعدين الاقى نفس النمرة كل عشر دقايق رنة ..
لدرجة انى كنت سايب الموبايل بعدها بتلت اربع ساعات رجعت لقيت
9Missed calls
كان معايا ابن عمتى .. فقالى خلاص هات النمرة و انا حاقرفهولك ..
جه يديله رنة .. فلقى شخص بيرد عليه ..
لسه بيقوله مين معايا ..
لقاه راح قافل السكة فى وشة ..
فغالبا كده يبدوا ان فيه موضوه جديدة طلعت ..
تلاقى اى واحد بيجرب اى نمرة و يغلس عليها .. يمكن تطلع بنت و يغلس بقى ..
فياريت محدش يرد على نمر غريبة خالص لانه لو رد و طلعت بنت .. حيقعد يغلس عليها ..
فالاضمن ..انها تخلى اخوها او باباها هوه اللى يرد ..
او
ممكن هيه ترد بس تسيب الشخص هوه اللى يتكلم الاول ..
بس موضوع جديد ..
و غريب قوى ..