هو التاج ده عباره عن شوية اسئلة بنمررها على بعضينا ولا ايه ؟؟
اصل انا شوفت التاج ده قبل كده بتاع حوالي 14 مره تقريبا في كزه مدونة
طيب انا عاوز اعمل تاج جديد اعمل ايه ؟؟
اللي يعرف ياريت يقولي
----
طيب التاج ده من شقلبان
هجاوب عليه انا دلوقتي واستنوا بقى حاسومي لما يرجع من بلاد اليوكاهاما
----
انت مين ؟؟
أنا حمزه
( للعلم ده مش اسمي الحقيقي- لو عاوزين تعرفوا اسمي الحقيقي معنديش مانع بس في شروط P: )
شاب مسلم - مصري - عنده أمل في بكره وعندي أمل ان مصر هتبقى أحسن وان العرب والمسلمين عموما هيبقوا احسن - شاب بيحب الافتكاسات - من هواياتي الرسم وبالاخص رسم الكاريكاتير- التصوير- التصميم -التأليف - ممكن التمثيل - الانشاد ( صوتي عاجبني - حد ليه عندي حاجه!!) - اليومين دول الشعر - مع اني في اللغه العربيه مش متمكن اوي بس اهو بقضيها -- على رأي شقلبان
-----
مين اكتر ست اشخاص بتحبهم ؟؟
-سيدنا محمد صلى الله عليه وسلم
-أبويا وامي
- اصحابي بقى زي حاسومي وزدني وبايو
( افراد الشله الخنيقه دول)
P:
- اصحابي اللي اكبر مني زي شقلبان واعدوا
----
انت سعيد؟
اه الحمد لله
على الرغم من اني مبعملش كل اللي انا عاوزه
ساعات بحس اني قاعد كده مليش لا شغله ولا مشغله
قاعد متنح وفاتح بقى
بس قاعد فرحان
شعور انك موراكش حاجه ده شعور جامد جدا والله
هو اينعم لو طول بيضر بس انا بحب الشعور ده
بحس اني ضارب بانجو
D:
اه
ببقى سعيد اكتر لو اتعلمت حاجه بالمجهود الفردي
ولو مسكت كتاب اقراه
------
لو اجتمعت انت وحسني مبارك في غرفة واحدة؟
هقوله ازاي حضرتك عامل ايه ؟
ربنا يوفقك ويرزقك البطانه الصالحه
كان ليا عند حضرتك طلب ياريس
ياريت لو تقول المسئولين يشوفولي شغلانه في اي شركة ادوية كبيره
D:
-----
لو معاك مليون ونص جنيه......تعمل بيهم ايه؟
هبدأ في تنفيذ مشروعي الخاص
أيا كان بقى صيدلية - مخزن ادوية - ترزي D:
/
هخططله الاول كويس وبعدين ابدأ :)
-----
بتحب مصر؟
مش عارف اجاوب بـ اه ولا لأ
بس انا نفسي تكون مصر هي الدوله رقم واحد في كل شئ
اقتصاديا وسياسيا وتنمويا و......
يبقى كده بحبها ولا لأ ؟
-----
بتحب البنات؟
الى حد ما
P:
اجابه خنيقه مش كده
-----
انت مسلم ؟وليه ؟
اه الحمد لله مسلم
والسبب الرئيسي في ذلك هو اني اتولدت مسلم
وبعد كده قارنت الاسلام بغيره فوجدت انه فعلا الدين عند الله الاسلام
-----
مين اكتر شخصية ما تقدرش تستغنى عنها في حياتك؟ وليه؟
أبويا وأمي
ثم اخواتي
ثم الصديق المخلص ايا كان مين
ثم زوجتي في المستقبل ان شاء الله
----
ايه اكتر موقف محرج اتعرضت ليه في حياتك؟واتصرفت ازاي؟
مش فاكر والله
-----
ايه الأمنية اللي بتدعي ربنا دايما انه يحققها لك؟
اني اكون انسان ناجح
-----
تمرر التاج دة لمين؟
للدكتوره قبس من نور
هناك ٥ تعليقات:
حلوة اجابتك يا دكتور :)
بس ايه موضع الترزى اللى ممكن تفتحه ده
:D
هو فى أمل
تبقى النهاية ترزى
:D
عموما ربنا يوفقك وتبقى انسان ناجح زى ما انت عاوز
نور الأمة
الاجابات جميله زي ما نور قالت
(شعور انك موراكش حاجه ده شعور جامد جدا والله)
شمعني ؟!!
غير البانجو طبعا
:))))
-------
وايه حكايه الترزي دي صحيح
حضرتك تقريبا زعلان عشان في كليه صيديله :))
ربنا يوفقك حضرتك ديما يا دكتور
وان شاء الله تكون ناجح ديما
السلام عليكم .. تاني زيارة ليا لمدونتك الجميلة .. بس اول تعليق .. اولا .. مبروك علينا دخولك عالم التدوين .. ثانيا .. بالنسبة للتاج .. اجاباتك مستفزةةةةةةةةة بجد ... ربنا يرمك ويعزك
التاج اتمرر ليا ؟؟
ربنا يستر !!
جزاكم الله خيراً .. بس فعلاً الإجابات مش معتادة
مقولتش يعني اسمك الحقيقي
بس اسم حمزة حلو
مش مشكلة
باقي الاجابات حلوة بالذات مع الريس
قولو يشوف للشعب المصري شغلانة معاك
سلام
إرسال تعليق